@mbonku @mbonmu

Beta merasa bingong ketika membuat blog ini....
banyak sudah yang dibuat orang lain dengan tulisannya.... "kuti kata" (pinjam sebentar sa bung ee) dan banyak lai blog yang ada.
beta mulai pikir apa yang beta harus tulis di blog ini....
seketika muncul dalam pikiran beta.. ya ambon itu harus dipublikasi lewat tulisan orang-orang yang tidak punya peran penting yang tidak nampak di permukaan.
Orang-orang yang tidak memiliki tempat untuk menyampaikan sesuatu yang kiranya bisa di baca oleh orang lain. Bukan di dengar, karena kalo di dengar maso talinga kiri kaluar talinga kanan. Jadi beta su paleng lama mau menulis, jika akang salah tolong kasi saran par perbaikan jua, supaya mangkali ada hal-hal yang bisa diambil dan berguna. Orang tatua bilang skolah ilmu gampang tapi skolah hidop ini akang paleng susah.
Lalu mangapa deng ambonku ????
Bagini akang pung carita....
Sakarang ini di ambon jalan-jalan su paleng macet dengan kendaraan, roda dua, empat dan roda tiga. Pagi-pagi kalo beta mau pi skolah, nyong2 trap becak bilang jalang su paleng pono, macet deng kendaraan. Tarus ada rasa panas skali. Laeng deng dolo2 seng seperti itu. sajo dengan seng macet. Tarus sakarang kasus kasus banyak yang terjadi. Orang bunu orang laeng di jalang2 bagitu saja. Dong seng taku Tuang Allah lai. Balong lai kasus kasus korupsi yang dolo2 katong seng parnah dengar. Su rame di koran2. Ini mangapa la ?
Orang baku pukul, orang baku maki, orang selingkuh, orang pancuri deng macang2 kajadiang yang dolo2 akang seng ada. Balong lai kasus rumah tangga. Perceraian di mana2. Ini dunia su mau kiamat ka apa ? Manusia su tar taku lai.
Tarus kamareng tanggal 14 mei ada ujang basar. Banjir di AY PATTY, aer nai sampe di beca pung stenga badan, sampe lewat roda beca yang kacil2. Orang su seng bisa duduk di beca lai. beta pung lorong saja (lorong sagu) akang pung jalang su seng bisa lai, taong 2002 beta parna menyurat tapi DPR deng Pemerintah seng balas beta pung surat lai. Orang kacil bagini su pende seng mungkin dong lia. kayak Zakheus ka apa eeee !
Sakarang dong ada biking bae jalan pahlawan revolusi atau jalang diponogoro skarang. Akang jalang tu dong baru biking tapi balong 1 hari lai akang jalang tu surusak. Jalang su miring seng sama deng akang pung jalang dolo, nanti dong yang diluar ambon datang la lia akang jua.
Patong Pattimura, kamareng akang su baru, ada yang bilang musti biking adat par kasturung patong lama, kaseng nanti pimpinan2 dong ada yang calaka, abis seng biking adat. Waktu kasturung memang ujang panas seng brenti. Ya itu salah satu kebanggaan katong. Ujang panas mangakali karena christina bilang kasiang beta pung tamang dong su kasturung akang jadi beta manangis jua, makanya ujang panas turung.
Jambatang merah putih balong2 bangong lai, kanapa ini ??
Tarus terminal transit di passo lagi dibangong. Ada lapangan merdeka (segi tiga) akang dibuat bangunan2 baru nama merdeka square (nama bagus lawang) kanapa seng kas nama iko nama-nama daerah saja. Ya masi banyak lai beta mau carita tapi nanti jua eee !!!!! be continued